抵食大牌檔:
沙田最旺大牌檔蟹黃籠仔飯至出名

蘋果日報 2002/01/29 00:00


沙田的屋邨內有許多「冬菇亭」,其中一間起名「樂園」的大牌檔晚晚旺場,開業十八年由小菜起家,逐漸加入海鮮和潮式打冷。老闆話最希望食物令客人食得開心,其中一道鎮店之寶「金香蟹黃籠仔飯」味道出色,不少街坊甚至外來客都會慕名一試。
記者:鄭潔兒
攝影:陳陶鈞
金香蟹黃籠仔飯$78
以生、熟蒜和蛋白炒飯,飯粒要選夠香硬的食落至爽口。頂角膏蟹的蟹黃豐滿,將原隻斬件與炒飯一同包在荷葉內,蒸時濃郁的蟹黃滲進飯粒之間,荷葉的香氣又滲透又瀰漫,一打開來,嘩,和味!
試味報告:飯粒果然又香又爽,蟹黃鮮美又多又香。
蜜汁燒風鱔$55
將大白鱔起骨,以醬汁醃住風乾八小時,炸完再塗麥芽糖,鱔面即時立立令,老闆話直頭可媲美日本海鰻㖭!
試味報告:以糖衣包裹的鱔肉甜絲絲,咬落皮脆肉軟,味覺香甜。
香芹豬骨煲(配西洋菜)$68
用上湯煨新鮮豬骨,加枝竹、蘿蔔和香芹,成為最近流行的大湯煲。邊食湯料重可以邊加火鍋配料打邊爐,如西洋菜和豬骨就是一對好配搭。
試味報告:湯底清澈鮮甜中有股獨特香氣,就算唔食西芹的人也不期然喜歡那種清新的香味。
太陽蝦$60(上)
香煎桂花餅$43(下)
鹹蛋黃似太陽,所以用蛋黃脆漿炸的海蝦叫「太陽蝦」。桂花餅以大墨魚筒、肥豬肉和馬蹄切碎混合,炸至外黃內白,吃時可蘸由酸梅、甘笋和西芹等自製的酸甜汁。
試味報告:墨魚餅入口充實夠鮮味;鹹蛋蝦新鮮脆卜卜,大隻啲就更惹味。
潮式拼盤$48
雖然天時凍,但熱菜間來個涼酸開胃打冷確係醒神。加上以$48就可享有大墨魚、生腸、滷水鴨、金錢肚、牛𦟌、紅腸、滷水大腸和滷水豆腐全潮式拼盤,你話抵唔抵?
試味報告:魚露滷水醃肉入味,自製的辣椒生蒜醋又可吊出鮮味。







客家盆菜$68
新歲應節食盆菜,這大小適中的煲內層層叠滿鮮蝦、雞肉、北菇、扣肉、咖喱魚蛋、枝竹、蘿蔔和西蘭花,再淋個上湯芡,熱呼呼最啱冬天食。
試味報告:材料新鮮湯料熱辣,菜肉、海鮮味道統一。
愛心造就樂園
問老闆十八年來的經營心得,江生毫不猶豫地說最緊要有三個愛心,對食物、對夥計和對客人。食物一定要樣靚、新鮮、味道好,實行抵食夾大件。

店名:樂園大牌檔
電話:26913933及26030076
地址:沙田禾輋邨1號食亭
營業時間:下午5時至凌晨1時半
座位:200個
付款方法:只收現金
網頁:www.wochelokyuen.com