林峯同潘霜霜嘅親密照一而再被公開，林峯心情認真麻麻，日前仲患上腸胃炎，噚日林峯返電視城開工，明顯面青青兼瘦咗一圈，佢話係工作壓力大影響健康，至於有傳佢用2,000萬買番第三波床照以防被公開，佢就話寧願將啲錢用嚟投資，兼且希望潘霜霜冷靜啲喎！
林峯同舊愛內地小舒淇潘霜霜嘅床照流出已差不多半個月，之後又有第二波嘅二人親嘴照被公開，林峯傷盡少女粉絲嘅心，加上話佢疑被潘霜霜出賣，大受打擊嘅林峯日前仲因腸胃炎入急症室，佢噚日返電視城開工時，個樣仍然死氣沉沉。

「啲錢用嚟投資好過」

林峯噚日上晝為新劇《回到三國》化妝及試戲服，現場見佢比之前瘦咗一圈，面尖兼面青，佢接受訪問時講到身體狀況話：「冇乜嘢，食咗藥。」問佢係咪因心理狀況影響健康？佢話：「唔會，拍戲拍劇壓力都好大，但都OK，我會撐住嘅，因為今次角色好重要。」林峯仲話今次喺《回到三國》演諸葛亮，十足《談情說案》入面ProfessorKing嘅古裝版喎！
有傳將有第三波林峯同潘霜霜嘅床照流出，仲傳林峯用2,000萬買咗嗰批相，佢回應話：「我未聽過，我有2,000萬啲錢用嚟投資好過啦。」問林峯有冇打電話畀潘霜霜叫停？林峯好決絕話：「冇。」
另外，有傳潘霜霜喺公開照片一事上已變得瘋狂，林峯就話：「希望大家都冷靜啲。」講完佢即被工作人員帶走開工。