【《還珠格格》法國Re-U】趙薇重遇皇阿瑪 舒淇接真人騷穩袋6100萬

蘋果日報 2018/06/17 15:46

舒淇趙薇還珠格格張鐵林
    舒淇為咗醫面上嘅皮膚敏感，今年停止拍戲，但最近佢就接咗湖南衛視嘅真人騷《中餐廳》第二季，同趙薇、蘇有朋、王俊凱、白舉綱等拍檔演出，早前已經有網民喺當地野生捕獲佢哋（新聞連結： https://bit.ly/2JWRkWM ）。舒淇係極少做綜藝節目，今次肯破例，首先因為係老友趙薇搵佢，第二個吸引係拍攝地喺法國科爾馬，第三個理由係有傳酬金高達5,000萬人民幣（約6,102萬港元），成件事係有人俾埋錢去歐洲吃喝玩樂，的確係幾爽嘅工作。
    今日大陸嘅唐皓工作室喺微博放咗喺法國拍嘅外景相出嚟，嘉賓方面仲多咗個張鐵林，講起張鐵林，20年前佢同趙薇、蘇有朋一齊拍《還珠格格》，佢哋3個今次重聚，當然係好鬼好傾，「皇阿瑪」張鐵林仲好熱情咁同佢哋兩個玩自拍，至於王俊凱同白舉綱兩個小鮮肉就係咁捉住舒淇合照。
    《中餐廳》第一季係由趙薇當店長，帶住黃曉明、張亮、靳夢佳、周冬雨等人喺泰國開飯店，節目播出之後收視率同節目反響一直好好，所以第二季先會加碼去法國小鎮經營全新餐廳，依然係趙薇做店長，帶住舒淇等隊友喺餐廳招中外食客，其中一集就係重遇皇阿瑪，舒淇、趙薇同蘇有朋都有親手煮幾味，聽講舒淇同趙薇都係廚藝高手，佢哋啲老公真有福，可以成日食到好嘢！
    精選娛聞，喺晒《娛果》
    http://fb.com/appledailyent
    empty
    趙薇、蘇有朋、舒淇同張鐵林喺法國齊齊演出《中餐廳》美食節目。（互聯網圖片）
    empty
    蘇有朋、張鐵林同趙薇雖然好耐冇合作拍劇，但私底下常有聯絡。（互聯網圖片）
    empty
    張鐵林答應做嘉賓，蘇有朋話全靠趙薇夠面子。（互聯網圖片）
    empty
    王俊凱、白舉綱兩位大陸小鮮肉難得見到舒淇，當然要同佢合照留念。（互聯網圖片）
    empty
    大家平時好少見皇阿瑪張鐵林下廚，其實佢廚藝唔錯。（互聯網圖片）
    empty
    20年前張鐵林、趙薇同蘇有朋組成嘅鐵三角組合拍《還珠格格》十分受歡迎。（互聯網圖片）