當年今日

股海實戰錄:候調整吸納Call輪

蘋果日報 2003/05/07 00:00


趙飛雲近排講多過做,除咗SARS影響炒股心情外,個市亦實在太難玩。港股今次反彈,基本上和近年模式一樣,都係以大裂口急升,散戶追貨起碼追高一兩百點,追得到亦未必有肉食,重要隨時接火棒。玩期指更好似幾十年前玩字花,大戶數完飛決定開好定開淡,咁樣㩒住搶,難怪離場嘅散戶愈來愈多。
利用技術分析炒股,如果嚴守紀律,輸唔死亦贏唔到大錢,但最怕遇上三兩百點的上落市,手氣唔好隨時左一巴右一巴,輸唔死亦會激死,所以有大智慧不如乘勢,捉到一個大趨勢才有機會贏大錢,散戶千祈唔好因為銀行利息低而迫自己亂投資。
港股近期以小雙底回升,但計及技術因素及基本因素,估計最多9300就行人止步,要出現一個較大的上升浪暫時唔容易。恒指昨日在50日線(現處8861)至平行下降通道(現處8950)範圍內窄幅上落,仍未有明顯方向,成交持續收縮及沽空增加則利淡,恒指最後收8889,跌27點。

8700附近買入
市場觀望聯儲局議息及格老對經濟評論,大市牛皮可以理解,美股周二晚走勢估計有較大啟示。納指周一晚升至去年12月高位1521受阻,杜指升破平頂三角形頂部8520出現後抽,但仍守8520之上收市。杜指及納指是繼續向上破位,還是因技術超賣出現回吐,將影響港股近期是先出現突破,還是先作調整。
趙飛雲心目中較理想的走勢,是恒指先回試8700附近,然後蓄銳再上,炒恒指Call輪就算升至9200受阻,亦有500點水位,不致太乏味。
趙飛雲