花旦揀首飾迎台慶
楊怡真空宣戰
楊怡希望揀選珠寶店最貴的首飾,在無綫台慶頒獎禮上突圍而出。
楊怡、陳法拉、郭羨妮及王君馨昨日分別到珠寶店及時裝店試首飾試衫。楊怡昨日到尖沙嘴英皇鐘錶珠寶試戴過百萬元首飾,她說:「𠵱家都未揀定,我想揀咗件衫,先決定邊套首飾,都想以elegant(高貴)為主。」
陳敏之打算真空上陣博攞獎,楊怡聽到很愕然,她說:「吓?佢真係咁講,唔信,一定唔會,一場姊妹佢唔講聲畀我聽。」不過,楊怡並不抗拒真空上陣,她說:「要睇件衫個cutting,真係要我真空都冇問題,大家都唔會注意呢啲嘢。」講到獎項,楊怡誓不低頭說:「我同胡定欣都係朋友,不過我之前講過唔會讓,要公平競爭,我喺頒獎禮前夕再講一次,我係唔會讓,雖然我心目中有人選,係琴姐,但係佢唔好讓畀我,我都唔會讓畀佢,我仲想再攞埋『女飛躍』(指飛躍進步女藝員),『男主角』就有人攞兩次,我都想試吓創造呢個奇迹,攞兩次『女飛躍』。」
另一邊廂的郭羨妮昨日身穿黑色低胸裙到中環試戴一套總值逾2千萬元、合共131卡的鑽飾。郭羨妮表示其母一早買了很多嫁妝給她,她希望可以盡快拿到嫁妝。郭羨妮透露18歲時有男仔送珍珠戒指向她示愛,被她拒絕了。
陳法拉昨日於中環周大福為台慶試戴2百多萬元鑽飾,她自言已挑選多套鑽飾和服飾於當晚佩戴,問到有沒有男士送過名貴首飾給她時,她說:「咁又冇!自己買嘅話成就感多啲,男仔送都唔知有乜嘢居心,不過我好少買鑽飾耳環,因為自己向來都好大頭蝦,仲試過唔見咗媽咪喺我18歲送嘅鑽石戒指。」
李詩韻獲時裝設計師CecilaYau贊助性感晚裝,日前她到店中試戰衣,她獲提名飛躍進步女藝員獎,至於假想敵,李詩韻表示睇好楊怡:「佢喺《溏心風暴之家好月圓》真係演得好出色,其實佢都攞過呢個獎,再攞都戥佢開心。」
採訪:楊潔雯、李珮洳、王崇穎
攝影:陳俊強、黃偉雄、黃文偉