財政司司長鬍鬚曾台灣之行節目豐富，前日去誠品聽咗香港獨立樂隊mylittleairport名作《DonaldTsang,pleasedie》，噚日出席「策進會」、「協進會」聯席會議時，又得台灣陸委會主席賴幸媛眷顧，上咗一堂歷史課，難能可貴。
賴幸媛噚日朝早喺聯席會議致辭，甫發言就觸及某啲香港人好敏感嘅起義、革命話題。賴主委話，舊年台、港暗中籌辦策進會、協進會時，港產片《十月圍城》正在台灣上映，呢齣電影以國父孫中山同興中會成員喺香港密謀革命做背景，好多台灣人睇完讚好。賴主委以國父當年搞革命情懷，同港、台密議合作相提並論，佢似乎感覺良好，但香港高官聽到，恐怕坐立不安。
賴主委又讚《十月圍城》忠實反映香港喺中華民國近代史上嘅關鍵地位，因為國父喺香港成立興中會總機關、出版《中國日報》、籌劃廣州起義、惠州起義等武裝革命。講到武裝革命，港官唔只坐立不安，直情面如土色，賴主委則以豪邁語調指出，「香港，是國民革命的發源地」。

「覺得與香港血脈相連」

高官只識香港係亞洲國際都會、遊行之都、「凍」感都市，搞革命真係多謝夾盛惠。賴幸媛繼續為港官補習民國歷史，指國父曾講過，「我之革命思想，完全得之於香港」，主委又話，正因為呢段歷史，令佢呢個在台灣土生土長嘅「正港台灣人」，「覺得與香港血脈相連」。
可惜賴主委並無繼續講台、港歷史，好似49年後易幟，當年好多香港人仍以中華民國為正溯，雙十節遍佈青天白日滿地紅旗等，又無讀出國父遺訓，否則港官就可以了解更多台、港深層次關係，兩地日後互動應該更良好。
台灣高官做足功課，由近而遠以百年歷史講台、港關係，我哋位財爺說甚麼好呢？佢話兩地街頭美食可以互補，台灣有鳳梨酥、小籠包，佢最like；香港絲襪奶茶、蛋撻、菠蘿油、西多士等等，則可以向台灣同胞大力推薦。

mailto:[email protected]