呢排個個都話要北上自強，又話要自我增值，八方都唔執輸，昨日去香港總商會，聽吓總裁翁以登（圖）同埋商會裏面嘅世貿專家陳偉群，同記者講解吓世貿係乜東東？中國入世又會對香港有咩影響？
八方去到金鐘統一中心二十二樓，俾個場面嚇咗一跳，成百個行家坐滿一室，大家重帶齊架生，攝影機、錄音機樣樣齊，好明顯唔係上堂咁簡單，無綫普通話台記者重要求翁以登用普通話講幾句，好彩佢有求必應，佢重準備咗五題FAQ（常見問題）自問自答，等記者又學到嘢又交到差。
講講吓，翁以登一句「香港商人有『愛滋病』！」，八方都嚇一大跳。原來翁總裁並非指摘港人北上太風流，而是借「外資病」諧音，點出在大陸做生意的港商怕做「外資」，想變「內資」攞多啲優惠。
論好學，《蘋果》肯定唔及《明報》，因為《明報》由新入行記者到總編輯張健波，總共有十幾人聽課，專心過八方好多。


E-mail：[email protected]