當年今日
關於我們

求驗客手記:朗尼做老竇 最緊要{Kai}子 - 求驗客

蘋果日報 2009/11/04 00:00


效力曼聯嘅英格蘭前鋒朗尼,前日首次做老竇。外界都好關心佢囝囝究竟叫咩名,結果係同海洋公園嘅老熊貓一樣名係叫佳佳(Kai)。咪以為Kai呢個英文名得3個英文字好簡單,查實有好多個解釋,而且個個好有意思。啲人成日批評朗尼同佢老婆高蓮淨係識出風頭,估唔到原來咁有墨水。
高蓮改名大有來頭
小朗尼喺英國時間禮拜一晏晝出世,雖然比預產期遲咗9日,但就母子平安,而且仲喺禮拜二出院。朗尼件頭都相當大,所以小朗尼亦算係巨B,有成8磅2安士重。小朗尼個名叫Kai,全名就係KaiWayneRooney,聽朗尼阿嫲柏蒂講,個名係高蓮改嘅,而Kai呢個名喺英國屬於冷門,事關喺舊年BB仔名字排行榜,只係排第68位,不過就好有意思,例如喺國語音「凱」,即係勝利,而喺古波斯話同埋北歐話就分別解做「大王」同埋「鎖匙守護者」。
不過,亦有話由於Kai係朗尼至愛電腦遊戲MortalKombat入面一個角色,朗尼先決定幫囝囝起個名。博彩公司威廉希爾嘅發言人就話:「過去3個月都有人投注朗尼個BB叫咩名,不過就冇人估中係叫Kai。」
小朗尼話晒係名人之後,雖則出世先得嗰兩日,但經已有好多人講緊佢大個後會點樣。朗尼係世界級前鋒,小朗尼或多或少都會遺傳到爸爸嘅足球天份,博彩公司亦開出有關小朗尼嘅特別賠率。
柏蒂就話:「我哋都希望佢可以好似爸爸咁,喺球場取得成就。希望費爵爺會簽佢啦!」我求大俠唔知道小朗尼會唔會好似爸爸咁叻,不過就祝福佢快高長大同埋健健康康,同埋希望唔好做獃子(Kaizi),即係儍仔就得嘞。
小朗尼特別賠率
喺英超踢波:101倍
效力曼聯:126倍
代表英格蘭踢波:151倍
代表英格蘭打板球:501倍
做英國首相:1,001倍
賠率來源:威廉希爾