這天第五場四班千六米,由雷神策騎2.5倍賀廐「團圓飛舞」大熱取勝,八歲馬跨季近四仗未逢敵手,悉數由雷神經手,並由五班贏上四班,堪稱繼孫廐「麟轉乾坤」後另一匹低班馬王,而雷神亦取得個人呢日第一Win。
「團圓飛舞」上季由鄭俊偉訓練期間零頭馬,上季中食回頭草重返賀廐至今,五戰獲四冠一殿例有獎金,服役累積五捷,清一色以賀廐馬名義取得。至於鄭俊偉第四場憑前葉廐馬「火龍寶」贏現任葉廐馬「神朗」,氣走葉楚航,呢場卻畀賀賢剝牙骹,跑馬就是這樣的!
「團圓飛舞」今場後上一攻而破,輕勝逾兩身位,咁啱同佢串Q之潘頓座騎葉廐馬「真慷慨」又係八歲,呢條5.3倍老馬大熱Q無驚無險有錢收。跑第三係郭能策騎之「包裝騎士」,第四名梁家俊座騎「勝風」,四重彩有一萬八千幾蚊派,有賴後兩駒都係冷門身份。
今日最慘係葉楚航,佢屯重兵連場出擊,惟截至第五場為止,先後有「勝在煌」、「保羅威威」、「神朗」、「真慷慨」屈居亞軍,可謂非常冇運。