劉德華監製兼主演、馮德倫執導的動作冒險片《俠盜聯盟》將於8月11日正式公映，其他主演還有舒淇、尚連奴（Jean Reno）張靜初同楊祐寧等。呢排電影公司開始推預告片出嚟，而舒淇尋日都有放劇照上微博，照片中嘅佢同華仔、楊祐寧企、坐喺飛機上面好鬼神氣擺甫士，仲留言：「去年 過去 那年 友愛。」
呢部戲對舒淇同馮德倫嚟講係有特別意義，因為佢哋喺布拉格拍外景期間，瞞住成個劇組，然後靜雞雞去結婚，婚後先至公告天下。所以呢部戲係佢同老公婚後第一部戲，佢梗係會好落力幫忙宣傳。部戲故事係講劉華、舒淇同楊祐寧3個飛賊合力偷咗法國古堡中嘅絕世珍寶，令堡主大為震怒，誓要搵出佢地3個人。咁尚連奴就係當地警長，一路想捉住佢地，但次次都俾佢地走甩。