當年今日

汽車專題:
警方最新公布2001年失車數字本田Civic居榜首

蘋果日報 2002/01/27 00:00


雖然,近年嘅失車數字開始有減少嘅迹象,但喺2001年仍然有2,562部車輛被報失,當中報失私家車嘅數目,更佔咗1,599部;而呢批報失車輛除有機會被不法分子拆為零件,或運往外地出售圖利外,更有機會成為賊人犯案時所用嘅交通工具㖭。今日就不如一齊嚟睇吓,有邊幾款車係屬於高危車款啦。

記者:鄭達基 
資料提供:香港警務處
第1位本田Civic (失車數目:262部)

根據警方公布嘅資料顯示,去年共有262部本田Civic報失;而Civic成為失車排行榜冠軍主要嘅原因,係因為Civic屬年輕車迷追捧嘅車款之餘,兼且更係各大賽車場嘅熱門戰馬選擇,故此有部分Civic被賊人偷去後,會被拆為零件出售圖利。同時亦因為上述嘅情況,而令到部分Civic嘅車主,為座駕嘅保險問題而煩惱。
第2位本田Accord (失車數目:111部)

至於一向走行政房車路線嘅本田Accord,喺2001年亦有111部被報失,穩佔失車排行榜嘅第二位;無論係日本版嘅AccordSiR、高性能版本嘅AccordEuroR,以至係廣受車迷歡迎嘅普通Accord四門房車,亦成為不少賊人嘅目標。而部分Accord被偷去後,都會被「化整為零」拆作零件,甚至係以「二手車」嘅名義,運往其他地區出售圖利㗎。
第3位三菱Lancer (失車數目:74部)

同樣廣受車迷歡迎嘅三菱Lancer,去年亦有74部被報失;而當中嘅主要原因,係因為有部分Lancer被用作非法賽車或落場賽車用嘅戰馬,喺零件需求甚殷嘅情況之下,故此有部分被報失嘅車輛喺被偷去後,都會拆為零件出售圖利。另外,更可能會被人「借屍還魂」,將失車嘅零件套在另一部「事故車」身上,再在道路上行駛或當二手車出售㗎。
第4位豐田Corolla (失車數目:72部)

屬家庭房車類別嘅豐田Corolla,喺2001年嘅失車數字亦高達72部;可能由於近年有不少車迷熱衷改裝Corolla,務求將之變成有型有款兼狠辣嘅座駕,故此喺零件需求高企嘅情況下,Corolla嘅失車數字亦有所攀升,穩佔去年失車排行榜嘅第四位。
第5位三菱Galant (失車數目:64部)

三菱Galant喺2001年被報失嘅數目達到64部,雖然較上述四個車款嘅數字為低,但仍穩佔失車排行榜第五位;而被賊人偷走嘅Galant,亦有機會被拆件當作零件出售,甚至有部分失車更會被運往其他地區出售圖利㖭。
汽車防盜好方法
若想保障自己座駕嘅安全,以免成為賊人獵物的話,大家可參照以下由香港警務處防止罪案科所提供嘅有效汽車防盜方法㗎。

堅守嘅原則
1.謹記鎖好門窗,方可離開座駕。
2.安裝堅固嘅波棍鎖或腳掣鎖。
3.為座駕安裝截斷電源或汽油供應嘅裝置或警鐘系統。
4.安裝有效嘅汽車追蹤系統。
5.採用堅固嘅車輪鎖。
6.喺車窗上蝕刻車牌或標記,以資識別。
7.替價值不菲嘅胎軨裝上堅固嘅胎軨鎖。
8.確保音響器材安裝穩妥。

忌犯嘅毛病
1.切勿將貴重物品留於車內,若別無他法的話,就必須將呢啲物品放置於行李箱內。
2.切勿將車匙遺留於車內。
3.切勿打開車窗後不顧而去。
4.切勿於晚上將座駕停泊在黑暗或人迹罕至嘅地方。
如果大家能夠跟住上述各項方法去做的話,咁你同你嘅座駕都可以安枕無憂啦。

後話:
除上述多款高危失車外,其他牌子及型號嘅汽車,喺去年亦成為咗不少賊人嘅目標(失車數目達1,016部)。
另外,雖然2001年嘅失車數字較2000年減少咗242宗,而被尋回嘅失車百分比亦高達55.3%,當中四驅車及高性能車輛嘅報失數字亦有下降趨勢,但大家仍不能掉以輕心,必須為自己嘅座駕做好防盜措施,以免賊人有機可乘㗎!