雖然陳四萬宣布唔選特首，令唔少等睇戲嘅政圈中人大失所望，不過好彩唔夠幾日，四萬立即「變臉」，拳拳到肉咁對準煲呔個強政勵治嚟打，又話佢擴大問責制想獨攬大權，一時間四萬同煲呔隔空開火，睇到班政府中人同民主派個個眼定定，唔知四萬想點，但有政府中人話，四萬𠵱家咁打煲呔，真係分分鐘傷過佢選特首。
該政府中人話四萬好叻，對住阿爺就係咁示好、話自己無野心、連特首都唔選，之後就一拳拳砌煲呔，又話佢搞大權獨攬、又話佢搞到公務員無晒士氣。由於四萬熟識煲呔，知晒佢死穴，自然吓吓打正煲呔弱點！再加埋𠵱家四萬又唔選特首，又唔可以再話四萬想為自己政治野心打煲呔，而且阿爺都唔會喺呢個時候撐煲呔，費事俾有心人利用，周圍話「中央挺曾」，所以怕且四萬有排玩煲呔，煲呔若然反擊，就係抬舉四萬，任人打又好傷，聽聞煲呔班師爺都好頭痛。

民主派睇戲咁睇

四萬就冇你咁好氣，噚日佢去港台《清談一點鐘》接受訪問，就點咗首由已故著名爵士樂歌手NatKingCole唱嘅《Smile》，佢話呢首歌由佢讀中學、大學、入政府、到退休聽咗幾十年，好鍾意呢首歌，覺得喺逆境中要保持笑容，以開懷面對困難，咁樣始終有雨過天青嘅一日。睇番陳四萬自回歸後種種遭遇，特別係俾老董迫到佢提早退休，又唔怪得四萬咁鍾意呢隻歌。
正如民主派中人話，四萬𠵱家心情肯定好，又唔怕再俾人插佢搞亂香港，又可以周時出嚟篤吓煲呔，十足十班工聯會對付煲呔咁，只要唔反阿爺，只鬧煲呔，咁你就冇事；至於民主派點反應好，佢笑笑口話，「咪買定花生等睇戲，兼夾睇吓四萬插煲呔時，可唔可以乘機踩多煲呔一腳！」