有名叫做「肥仔張」，可見政務司司長張建宗都算有份量，佢曾經透露過每朝會抽半粒鐘做運動，跳繩、玩呼拉圈同sit up等都包括在內，仲會邊流汗邊睇新聞，呢種快感，卻似乎冇令佢更弗，肥仔張自己喺網誌自嘲有個「小肚腩」，好明白超重同肥胖成因同飲食習慣及生活模式有關，所以時刻警剔要進行適量體能活動，遠離高脂同高糖食物噃。

為乜要喺網誌自揭月巴事？原來又係關hardsell事。肥仔張話呀，「兒童肥胖」係日益嚴重嘅公共衛生問題，而佢作為將即成立嘅兒童事務委員會主席，特別關心細路仔嘅健康成長，指政府喺促進公眾健康上扮演重要角色，而政府喺今年財政預算案每年額外撥款一億鼓勵市民採取健康生活模式，以防治非傳染病同推廣精神健康。