香港樂壇嘅Rapper唔多，但喺美國回流嘅歐陽靖（MCJin）最近就好矚目，一句「ABC係我係我」唱到街知巷聞，仲憑呢首歌掃咗樂壇頒獎禮唔少獎項。同樣係美國放洋返嚟、被認定好有鬼佬作風嘅財爺鬍鬚曾，似乎都好欣賞歐陽靖。鬍鬚曾喺自己個網誌自爆，兩星期前宴請咗包括阿Jin在內嘅幾位年輕人去佢官邸作客，聽吓時下後生仔有乜創見。

獲邀當奧巴馬助選團

阿Jin嘅威水史其實好多人都知，當年佢喺紐約住時，因為創作咗一首rap歌《給奧巴馬的公開信》（OpenLettertoObama）名噪一時，仲被邀請做奧巴馬助選團成員，認真巴閉。照睇阿Jin應該對時事幾有興趣，鬍鬚曾就打蛇隨棍上，叫阿Jin創作多啲關於香港社會同政治嘅rap歌，等年輕人有多啲共鳴。
不過，喺美國返嚟香港發展冇耐嘅阿Jin嘅回應，就肯定令鬍鬚曾打消呢個念頭，原來阿Jin根本分唔清究竟曾蔭權係一個人，抑或係一個職位。雖然呢個答案明顯令人O嘴，但鬍鬚曾就話非常欣賞阿Jin咁「直率」，唔知當事人煲呔又有乜嘢感受呢？