今晚仁濟慈善晚宴喺君悅酒店舉行，林建岳女兒林煒珊同林煒珽、馬詩慧、鄺美雲同三位應屆港姐等出席。

鄺美雲表示係因為公司同事珠寶設計得獎，嚟支持佢，問佢想唔想都得獎?佢話:「自己都係做評判多，準則係睇可觀性同實用性，有啲天馬行空戴上去唔舒服就唔得，要細緻，著晚裝唔會勾到。」

問佢會唔會去旅行攞靈感，佢話:「去左巴黎雙年展，見到最新設計用好多顏色嘅寶石同半寶石。」有冇睇中?佢話:「好鐘意唔同顏色，好適合做珠寶。」又話珠寶可以帶俾人歡喜，係開心嘅行業。

鄺美雲坦言有留意佔中，佢話:「而家落雨有閃電，覺得健康緊要，大家都好攰要休息，有唔同聲音可以，但唔可以激動，和諧好重要，冇和諧講乜政制都冇用，啲新聞唔開心，警察好辛苦，大家都係香港人，唔好邊緣化，我哋有事撞車打劫都係搵差人，佢哋都係執勤，所以唔好嬲。」

同場嘅汪詩詩就同媽媽一齊，妹妹汪圓圓送薑醋，佢話個包裝諗咗好耐。問到妹妹身體點，佢話:「坐緊月，好健康，有啲嘢唔食得。」有冇食好多補品?佢話係陪月安排，唔知道。咁BB重咗好多?佢話圓圓買咗兩套BB衫都著唔到。

問到BB會唔會好難湊，佢話:「Karson同圓圓都覺得好好，佢冇打比我請教，反而圓圓見到我出活動，好掛住，想出活動。」問圓圓修身未?詩詩話:「順其自然，我當時要6個月，佢餵人奶瘦得快，第一胎比較緊張。」

講到佔中，詩詩話有留意，佢話:「兩方面最重要和平解決，而家啲新聞愈來愈亂。問佢邊兩方面，佢話:「大部份都係警察同學生，政府係另一個題目。」小朋友有冇問佢?佢話阿女唔清楚，不過同朋友間都有發相，問小朋友係咪正常返學?佢話係，不過就冇咗補課。

同場嘅三位應屆港姐邵珮詩、王卓淇同何艷娟，問到有冇留意佔中?冠軍邵珮詩代答:「我唔熟政治但有留意，有想法有教育嘅年青人為香港，以和平方法去表達覺得感動，好激勵，希望佢哋安全。」講到身為香港小姐係咪要留意政治?邵珮詩話會知道，有睇新聞。