資深大律師鄭若驊盛傳接替袁國強出任律政司司長。本身是「公職王」的鄭若驊，早於2009年已獲委任為臨時最低工資委員會主席。曾與她交手的勞方委員、前立法會議員鄺志堅表示，鄭處事公正，得到勞資雙方尊重，更記得當年最低工資的討論到最關鍵時刻，有一名資深委員欲起身離開會議，被鄭一聲喝令「坐番低」，「佢係有耐性，但唔係可以恰佢，都好硬」。

鄺志堅表示，鄭若驊其中一個特點就是很有耐性。他說，當年勞資雙方就最低工資拉鋸，「資方嗌20蚊，勞方要35蚊，企得好硬」，但鄭都能夠柔性去處理問題，「當拗到火紅火綠，佢就會有方法令大家平靜啲，拗唔掂就休會，再私底下用其他方法搞掂」。他指，鄭願意聆聽兩方意見，可能與其擅長仲裁有關，「尊重勞資雙方嘅睇法，盡量搵啲空間大家都傾得掂」。

不過，鄺志堅笑言，鄭若驊都有惡的一面。他記得有關臨時最低工資開會到晚上八時多，當討論到最關鍵時刻，一名很有地位的委員欲起身離開會議，被鄭喝令「坐番低」，「佢可以柔性處理（問題），但都可以好硬，都好有主見，好有威嚴」。

盛傳鄭若驊接任律政司，鄺志堅認為是合適人選，「佢好有睇法，亦可以柔性處理，亦都好有耐性同公正，容易得到人信任，係做律政司嘅條件」。但他認為，鄭的政治經歷較少，「而家咁政治化環境，對佢係一個挑戰」，若要處理23條立法，更是相當棘手，「要考佢牌囉，係難嘅，尤其而家撕裂得咁緊要，冇互信，仲衰過03年」。

鄺志堅指出，無論任何人接任律政司司長，要處理23條立法都有難度，「就算搵翟少（翟紹唐）、李柱銘都難做，而家嗌到唔立法」。但他認為，鄭若驊對於23條立法，「佢應該有諗法」，至於鄭能否捍衞司法獨立，他認為不應過早判斷，可待她上任作出監察。