梁詠琪(Gigi)近日為＜好時辰演唱會＞Part 2操練排舞，今次更難得是20年來第一次推出演唱會紀念品！

梁詠琪找來星級插畫家Mickco Chan，將她的插畫肖像製成T恤box set。「真係二十年來第一次，因為我比較難接受將自己個嘜頭印響Tee、帽呀，一直覺得唔好意思，但用插畫肖像又幾有型喎，所以咪試下。」她大讚插畫肖像似足自已，但笑言是「十頭身」美少女版本，「最大特徵係畫到我條頸好長，咁我條頸係好長，隻腳又係好長。呢個身型俾我啱啱生完女時見到，　真係可以加速我減肥，哈哈！」

Gigi透露完成演唱會後，會暫別一段時間湊女，「真係想focus返家庭生活度，Sofia大得好快。所以，減肥又好、練歌又好、跳舞又好，做到最盡先，我每一次做演唱會，都當係最後一次咁嚟做，因為唔知仲有無機會再做，有時開完，都會莫明甚妙咁有啲傷感。」她指平日也有和囡囡畫畫，更體會出要放手讓女兒成長的道理，「我見佢畫一個公仔，出晒界，我想stop佢，但後來又諗，可能我睇到嗰公仔係米奇老鼠，佢係睇到另一樣野，所以唔應該先阻先佢地，要俾佢地自己創作。我覺得小朋友，畫畫又好，唱歌又好，不用教佢點樣畫，因為佢地其實係無一個框框的，係應該自由發揮。」

星級插畫師Mickco兩年前因為<志明與春嬌>畫插畫而走紅，曾為不少明星畫肖像、和時尚名牌、Sogo等crossover，今次用了兩星期畫了Gigi造型，亦畫了多個肖像，「我本身係佢fans，好開心佢搵我，Gigi輪廓比較分明，我都睇咗佢好多舊戲、一路聽住佢的＜紅棉路上＞，捕捉佢神態。」由興趣為朋友畫肖像，到最終成為事業，Mickco坦言每一個project都印像深刻，為偶像梁詠琪作畫更是難忘。