日本男神福山雅治今年9月突然宣佈同女星吹石一惠結婚，令到好多女粉絲都好傷心，有唔少粉絲因此而離棄福山，仲出現埋流行語「福山Loss」。而福山每年年底都會喺橫濱舉行《福山冬之大感謝祭》演唱會，今年頭場騷就喺今晚舉行，福山似乎唔怕粉絲火滾，喺演唱會中親自向粉絲提及結婚。

福山喺演唱會中途講：「今年係入行25周年，時間真係過得好快，而我今年私生活方面亦有咗變化，終於可以親口同大家講！」於是全場粉絲起哄，搞到佢有啲尷尬，福山仲話雖然結咗婚但會同以一樣，繼續努力，請大家多多指教喎。佢之所以唔怕激嬲粉絲，皆因外界話好多粉絲離棄佢，但佢今次8場騷全部爆滿，證明冇影響人氣。