開局好好嘅特首林鄭月娥，2019年運勢轉弱；三隧分流、收緊長者綜援同派錢4,000蚊，都搞到一鑊粥，事事硬闖，然後踫壁，到今日（28日）終於有嘢沖喜。娥特朝早喺禮賓府，同美國傳統基金會創辦人傅爾納會面兼「攞獎」，喺對方手上，接過傳統基金會日前公佈、評選香港為全球最自由經濟體嘅2019年《經濟自由度指數》報告。

香港連續25年，蟬聯最自由經濟體榜首，今年總分維持於90.2分，再次成為唯一一個總分超過90分嘅經濟體。份報告仲讚揚香港經濟應對逆境嘅能力、有優質嘅司法制度、廉潔嘅社會風氣、透明度高嘅政府等，黑氣蓋頂嘅娥特，梗係唔放過吐烏氣機會，特首辦今日出稿話，娥特欣悉呢啲評論，又po相沖喜一番。

之不過，報告同時講到香港「司法有效性」評分下跌，又話雖然香港司法獨立，但中央政府保留對《基本法》最終解釋權，限制終審法院權力，娥特就特別話明唔同意囉，仲叫傅爾納留意番，由終審法院行使終審權同由人大常委會行使對《基本法》嘅最終解釋權，係體現「一國兩制」同高度自治嘅獨特安排。

娥特仲話，「司法有效性」建基於高效及公平的司法制度，話香港特區嘅獨立司法權同終審權，受《基本法》保障，司法機關嘅公平公正，不受任何干涉，係無庸置疑嘅。

唔少市民聽完，唔知會唔會諗起娥特黑箱拍板三隧分流方案、偷偷攝入《預算案》老屈立法會通過收緊長者綜援安排，同埋UGL案前特首梁振英獲放生呢幾單嘢呢？

每晚送5萬！星期一至五晚上10點半
《動腦Q》Let's Q the money！
http://bit.ly/2QW8LcI