【新增回應】

現年49歲嘅阮兆祥最近呢一個月諸事不順，佢先喺大埔塞車切雙白線逆線行車，之後由沙田載女友去荃灣食飯期間，所駕駛嘅綠色Benz狂撼貨車車尾，全車起火爆炸，燒到身無分文，好彩兩個都冇事，算係不幸中嘅大幸。（ 相關新聞： http://bit.ly/2e5lzwW ）

唔知呢單車禍係咪太過驚嚇，要睇醫生定定驚，日前讀者馮先生就透過「爆相爆片」，話見到祥仔同女友去咗尖沙嘴一幢商業大廈睇醫生，不過佢哋所睇嘅醫生並唔係普通門診，而係一間頗有名氣嘅糖尿病腎病及綜合內科中心。

馮先生話當日中午12點半左右，見到祥仔同女友去到求診，由於診所好多人，祥仔都要排隊輪候，亦冇耍大牌用明星關係插隊。祥仔登記完，姑娘幫佢量血壓，之後佢就坐低玩手機，估計祥仔係第一次睇呢位醫生。

由於祥仔上去嘅時間都幾晏，係放食晏前最後一個病人，結果佢哋等咗大約一個鐘，去到1點半祥仔同女友講咗兩句，就由女友代去櫃枱問姑娘，無耐就入咗見醫生，成半個鐘都未出嚟。

祥仔回應傳媒時說：「我冇事呀，只不過嗰個專科醫生，其中係睇睇腎㗎啫，只係我朋友嚟㗎，又係熟醫生，所以上去睇吓啫！唔使擔心，我個腎好OK！」