前曼聯隊長堅尼出自傳爆料，真係多到我求大俠寫都寫唔晒（見附表），但最令人估唔到嘅係，原來堅尼同傳奇門將舒米高喺香港打過交，仲打到牛高馬大嘅丹麥門神變咗熊貓眼！

喺堅尼新出嘅自傳《下半場》入面披露，曼聯97年訪港，堅尼同舒米高飲到醉醉哋，夜晚喺酒店打交，仲嘈醒埋卜比查爾頓，要成60歲嘅卜比Sir分開佢哋。堅尼話：「舒米高捉住我，我就用頭頂佢。其實我哋兩個成日打交。喺之後嘅記招，舒米高焗住要除咗副黑超，全世界都見到佢隻眼瘀咗，記者即刻問佢發生咩事。佢就話喺夜晚嘅操練食咗一踭。件事就咁完咗。」但堅尼都讚舒米高有責任感，係個好門將。
堅尼仲大爆，原來簡東拿退休後，曼聯件7號波衫唔係諗住畀碧咸，「費格遜嗰陣叫咗我入房，話想將件7號畀我，但我唔想。佢話碧咸好X想要件7號，但唔想碧咸着住。我同佢講，我由加盟曼聯起就着16號，我覺得16號好舒服，同叫佢放心畀件7號碧咸。碧咸最後做咗7號仔，佢非常適合。」講開7號，堅尼都好欣賞基斯坦奴朗拿度（C朗），「當年我哋同士砵亭友賽時，我就知C朗未來一片光明！嗰陣係奧沙守住佢，但半場奧沙已經俾佢玩到暈陀陀，要去睇醫生咁滯。」

堅尼出自傳，又點少得鬧人，有次前曼聯助教基羅斯教訓堅尼，仲講到忠誠嘅問題，堅尼即刻寸佢教完皇馬一年後又返曼聯，學咩人講忠誠。嗰陣係05年，曼聯處於低潮，堅尼仲爆粗鬧費格遜，「我哋需要你做多X啲嘢（We need f****** more from you）。」堅尼話費格遜份人粗魯，好後悔之後同佢道歉㖭。喺呢次吵大鑊入面，新加盟嘅門將雲達沙諗住做和事老，點知俾堅尼鬧埋一份，「點解你仲唔X收聲呀？你嚟到呢度得嗰兩分鐘，但做嘅訪問仲多過我12年嚟做嘅。」鬧完費格遜冇耐，堅尼就被踢落預備組，之後就離隊。

識睇，一定係睇足英台【英波Live】：
http://soccer.appledaily.com
http://bit.ly/engballlive