民主黨立法會議員涂謹申平日喺立法會質詢官員時中氣十足，可能同佢兒時經歷有關噃！阿涂話佢細個先後喺新蒲崗、慈雲山住過，雖然居住環境好多三教九流、甚至黑社會打打殺殺，但由於佢爸爸係中醫師，唔少黑社會、甚至黑社會人士父母都要去求醫，令唔少人知道佢係「中醫師個仔」，所以一直都無人敢蝦佢，而佢仲成日喺中醫鋪食高麗蔘，或者幫佢補咗氣。

身為家中獨子嘅阿涂，今年踏入55歲。佢年幼時喺新蒲崗現已停止辦學嘅督信幼稚園讀書，小學就升咗去中華基督教會基華小學，之後就入咗九龍華仁，再喺港大法律系學士畢業，之後就做律師，再做埋區議員兼立法會議員。

阿涂話兒時最難忘，就係當年細細個時，已經邊做功課、邊身兼「掌櫃」幫手睇舖同賣嘢，而佢更有一個特殊習慣，就係食高麗蔘！阿涂話爸爸間中醫舖有好多飲涼茶時嘅「送口」，包括山渣餅、嘉應子等，但佢全部唔鍾意食，只愛食一片片嘅高麗蔘，因為食落甘甘地，好過癮喎，卻因此經常畀爸爸打手板，鬧佢：「食窮嘞！十幾元一片㗎！」阿涂仲話囝囝可能有佢呢方面嘅遺傳，細細個已經好鍾意食蔘，佢就覺得現時中氣十足，就係因為自小已經食高麗蔘補氣！

過去經常幫家人睇舖嘅阿涂話，過去都學過吓中醫，有跟爸爸學習望聞問切，但學到中三、四就無學，透露佢爸爸其實一直都想佢讀醫，咁就可以做到中西合璧啦，但佢最後喺大學時代，都係揀咗讀法律系，笑指原因相當簡單，就係因為發現同房讀醫嘅同學，經常都要讀書讀通頂，實在太辛苦，覺得讀法律易好多，而佢83年喺法律學院迎新營做組長時，組員之一仲包括前律政司司長袁國強，但佢話兩人交流唔多。