吊帶裙、黑絲、高踭鞋、皮鞭、綑綁、尖叫，見到呢幾樣嘢大家會諗到啲咩呀？S……冷靜啲，講緊嘅係小S徐熙娣為愛奇藝綜藝節目《姐姐好餓》拍宣傳片。

小S身穿性感火辣衣着，兩手被綁喺櫈後，困喺一個貨倉入面，然後一個黑衣男人手持皮鞭步近，狠狠地鞭打小S，導致佢滿面傷痕，然後開始質問佢各種問題。就咁睇個描述都知呢條片意識大膽啦，不過個男演員就好似唔係好夠入戲囉，搵「扣你五十分」嘅馬德鐘去演可能更到位。

不過咁，其實條片都係搞gag嘅，小S話蔡康永請辭搞到佢冇節目做，又話自己每日都會po自己煮飯嘅相上網，仲話黑衣男唔係佢fans冇follow佢所以先唔知。

黑衣男又問小S點解咁鍾意食男人豆腐，小S就話自己咁做係為咗觀眾，為咗收視，咁佢先有節目。之後就tag自己嘅新節目，話《姐姐好餓》係搵好嘢食，唔係食男人豆腐，最就被黑衣男拖走。被拖行期間小S仲要問黑衣男幾多歲，可唔可以上佢屋企瞓一陣，夠晒抵死，果然貫徹自己嘅風格。