之前政府話搞美食車，點知原來係「移動唔到」搵笨版。唔知係咪因為咁，啟發咗天星小輪撈埋上岸，佢哋向海濱事務委員會交咗份文件，索性將小輪搬上岸，大搞「美食船」概念。天星小輪建議將中環摩天輪租緊嗰塊臨海靚地，3年期約滿後，交畀小輪公司改建做小輪廣場，同時將2011年退役、服務香港55年嘅「天星號」渡輪放入廣場，翻新做餐廳、酒吧兼展覽場地（圖）。（咁似黃埔花園架船嘅？）

#要納稅人畀錢

根據小輪公司介紹，天星號「上岸」後，會放喺一個巨型人造水池之上，要經條橋先上到船。入面所有座位會全部拆走，上層全層翻新做餐廳，船頭同船尾會有觀景台；下層就做展覽場地、咖啡室、酒吧同廚房。小輪公司仲話，新項目收益可以用嚟補貼營運緊嘅渡輪服務㖭。
嘩，乜有咁大隻蛤乸隨街跳呀？睇真啲，原來係要納稅人夾錢，天星要求政府畀晒興建廣場、運送同翻新隻船嘅全部費用。天星只係負責捐隻船同負責營運，賺到嘅當然入番佢自己袋。唔知天星呢個「不務正業」嘅安排有冇人Buy啦，但係塊地現任租客「香港摩天輪」睇怕都應該Say No。佢哋話按合約，3年租約後，係想同政府每季續租㗎，佢哋話諗住扎根香港有排做㗎。

費清
＃要生計，也要生活 ＃毋忘初衷