啱啱國內嘅《體壇周報》公佈咗2013年嘅體壇富豪榜，冠軍繼續毫無懸念地由李娜冧莊。其實上年都未算係娜姐嘅豐收年，但佢嘅1.25億人仔收入已經係亞軍林丹嘅4倍幾；今年娜姐仲要贏咗澳網女單，如果剩低嗰3個大滿貫又俾佢執到一兩個，下年個差距應該仲大㖭。不過咁，呢個驕人成績對娜姐嚟講只係濕濕碎啫，因為由2011年開始成為中國最有錢運動員，佢每年嘅收入都比排第2嗰位多成個零！
至於足球界嘅廣州恒大財雄勢大，所以有7個恒大球員成功打入呢個有16位成員嘅「千萬富豪俱樂部」，但7個人加埋嘅收入都仲係少過娜姐，大家只能講句sosad。再望一望，娜姐以外，榜上第2有錢嘅女運動員就係彭帥；唔通中國女將打網球真係咁好搵？可能遲吓民間會流出新金句：若要生活好，打網球最好。

論美甲最like拉雲絲卡

𠵱家身處美國打緊邁阿密網賽嘅娜姐，禮拜日對住東道主球手順利贏波晉級，所以賽後訪問時都心情靚靚，同記者閒話家常。娜姐向記者show美甲，話自己好鍾意去做美甲relax吓，仲話球圈入面最欣賞拉雲絲卡嘅美甲。唔知娜姐平時有冇同拉雲絲卡交流吓心得呢？