【李八方online】議席隨時不保 范國威或遺憾離場
蘋果日報 2019/12/16 20:03
立法會范國威李八方ONLINE區諾軒
有可能議席不保嘅區諾軒同范國威惺惺相惜，表明會繼續喺唔同崗位為抗爭運動出力。梁穎妍攝
香港眾志周庭及劉頴匡的選舉呈請案先後獲判勝訴，分別導致喺去年立法會3.11補選中勝出嘅區諾軒同范國威被裁定「非妥為當選」，案件最快聽日（17日）有判決，二人議席隨時不保；面對未知數，兩位都寄望喺地區議政，繼續為民主運動出力，以三文魚自比嘅區諾軒話，一息尚存都會為民主運動努力，咖喱飯就話最遺憾係若冇咗議席，令佢追究警暴嘅動議會自然死亡。
區諾軒同范國威都係議會陣線嘅一員，齊齊喺舊年3.11補選中贏得議席，上任不足兩年就可能要提早告別議會，二人今日同傳媒茶敍嗰陣惺惺相惜，提到二人有好多共通點，包括曾住埋同一個屋苑，區諾軒仲話自己由細到大喺將軍澳住，細細個就睇擔任區議員嘅范國威親自設計嘅工作報告，點估到而家成為議會同事，又因為議會抗爭雙雙被控。
范就笑指唔少同事「做咗衝衝子」，就算修改議事規則後抗爭空間收窄，「仍然相信議會抗爭呢條線要行落去」，又話自己難忘區諾軒喺反一地兩檢期間化身金教練衝向主席台抗爭。
兩位係咪失掉議席，有待分曉，范國威慨嘆可能要帶住遺憾離場，皆因佢同區諾軒都有針對反修例運動提出動議，佢自己嘅動議針對警暴問題，但預計要到農曆新年前後先可以進入辯論，屆時可能已經不能再提動議。好在佢喺上月成功連任西貢區議員，希望可以繼續利用議員身份支援運動，包括倡設社區永久連儂牆同埋探望被拘捕或監禁嘅抗爭者等，「區選改革我哋好多構思，有排忙，大時大節亦要探手足、喺地區收集心意卡」。
冇競逐新一屆區會嘅區軒就有可能成為「雙失人士」，但佢話自己最終目標點都係為香港做更多事，一定會搵到位置繼續服務，包括繼續扶助地區一班素人，畀市民睇到民主派執政有視野兼有承擔，又話民主派要繼續如履薄冰。雖然議會抗爭嘅付出有風險，但佢話議會抗爭一定要文武雙全，除咗衝，仲要有問政能力，令政府思考短路咁話，所以佢想進修，讀返個與政策研究有關嘅博士學位。