大劉劉鑾雄女友甘比(陳凱韻)近月開咗個公眾ig，不時po自己去活動嘅相，暫時都有150幾個followers，佢就暫時關注咗30幾個單位，當中有20幾個圈中人。噚晚佢就擺咗一張極罕同佢媽咪嘅童年照，原來佢幫手做慈善，幫手宣傳香港遺傳性乳癌家族資料庫。童年嘅甘比一樣眼仔精靈，平時cool爆樣嘅甘比媽大都係幫手湊孫，原來佢後生0個時有啲似莫文蔚，着晒bomberjacket，都幾有型。甘比就留言自己遺傳了媽咪嘅好心地，hashtag咗#inheritedgenes、#asiabreastregistry、#BreastConcernAction等，之後佢就tag咗袁詠儀、徐濠縈、丁子高、容祖兒、楊千嬅等人，呼籲佢哋都post兩代相幫手宣傳。

除咗甘比，仲有馬詩慧po同兩個女合照，莫文蔚、伍詠薇、趙學而、方健儀、湯盈盈、傅明憲、徐肇平等人都有擺同媽咪合照相，幫手關注遺傳因子及關注乳癌等議題。