早排先有操粵語女子喺紐約施展「人肉霸車位」神功，被網民狠批「X出國際」，今個月中就再有人肉雪糕筒現身沙田怡成坊，畀車cam拍低，雖然片段解像度唔高變咗「騎兵」版本，睇唔清涉事「雪糕筒」容貌，不過清晰錄低咗車cam片主同雪糕筒嘅對話，令唔少揸開車、有類似經歷嘅網民大讚片主EQ高。

是咁的，話說片中司機將車駛入怡成坊、沙田圍巴士總站旁邊嘅泊車錶位，眼見右手邊仲有個位，一心諗住泊埋去之際，駛前些少就見到一位男士企正喺位中間，全無讓開之意。以下就係兩位主角之間嘅對話：

雪糕筒：有架車嚟緊
斯文人：嚟緊？
雪糕筒：係呀我、我、我霸咗個位先
斯文人：人霸㗎？
雪糕筒：唔係…
斯文人：呢個人位（定）車位呀？
雪糕筒：……唔係…
斯文人：唔好咁老土啦。我畀你、我畀你。好老土呀，下次唔好咁做喇。

然後片主直接開車再兜過，繼續喺茫茫車海之中，搵一個車位。

理直，自然氣壯。唔使粗口、冇肢體動作，完美KO人肉雪糕筒。各位駕駛人士，下次再遇到人肉霸位，識做啦。