年過七十歲嘅美心伍家大小姐伍淑清,今日發惡,以前校監身份向中華基金中學嘅學生「照肺」,揚言會開除罷課學生及參與罷工嘅教職員,伍家大小姐咁勞氣, 因為今鋪真係好冇面。
依然獨身嘅伍小姐,一生為家族嘅美心飲食王國勞碌奔波,與梁愛詩為閨中密友的她,更成為中方「紅人」,中華基金中學係佢回歸後向北京獻上嘅「貢品」。話說九七年四月,伍小姐係飛機上巧遇將任特首既董建華,立即向老董推銷愛國教育,話香港以往長期實行殖民地教育,刻意淡化對國家民族之觀念,所以青少年學生對自己祖國歷史文化缺乏認識,回歸後必須扭轉這種情況,雙方一拍即合,於九八年三月由伍小姐牽頭成立「中華歷史文化教育基金會 」四出向「大袋」籌款,由董建華出任名譽贊助人,中聯辦主任姜恩柱任名譽顧問,並獲特區政府批地,於2000年開辦中華基金中學,想做一間模範學校,校內有不少高幹子弟來港讀書,學校作為踏腳石再跳出海外,呢個可以講係伍小姐向中共獻媚嘅「pet project」,誰不知學校開辦二十年未夠,校內學生近日響應罷課,搞到伍小姐面目無光,打住「中華歷史文化基金會」嘅旗號辦學,竟然教唔曉學生愛國、愛黨? 咁就真係死得囉﹗
撰文:宗菁華