楊秀惠榮升老闆娘之後要公私兩忙，o依家同張衛健合作拍緊大台劇《大帥哥》，另一邊又要為喺各地開張嘅「楊秀惠美妝店」落手落腳打拼，佢話經過多年發展，3年間營業額已經過千萬。

早排楊秀惠再擲過百萬喺新加坡開分店，成為香港之外第二個落腳點。秀惠話只係選址、設計同裝修，已經花咗半年時間。佢話：「選擇喺新加坡開新店，係因為當地嘅生意開始多，亦多咗代理同銷售商，所以要喺香港以外，開多間分公司嚟做支援。」早前佢親身飛到新加坡店視察，其實裝修時已經來來回回飛咗好多次，好在當地有親戚可以幫手跟進。

新店6月底先開幕，不過秀惠已睇定澳門市場，打算9月喺當地開店：「喺澳門已揀定新店位置裝修緊，香港會開多間，都有幾個舖位傾緊。」

嚟緊7月底要返大陸拍《大帥哥》外景嘅佢話要兼顧拍劇同做生意，每日都只係得幾個鐘瞓，做生意點都有啲犧牲。由於當地氣溫酷熱，為咗抗暑，佢話已經買定數把小風扇、雨傘同外景椅， 最緊要就係準備涼茶包同電飯煲，可以隨時煮飯唔使捱飯盒，最抵死係佢同同劇演員傾緊，係咪要自備一個外景雪櫃，可以隨時有凍嘢飲。而啱啱養咗隻狗狗嘅佢就話：「啱啱幫屋企隻狗狗買咗件衫可以放水入去，着上身可以長時間降溫，搞到我自己都想買件嚟着。」