【新增動新聞】
法國新星基利安麥巴比自從由摩納哥外借去巴黎聖日耳門（PSG）以來都好受隊友歡迎，除咗因為喺球場上有表現之外，同佢玩得嘅性格都好有關係，隊友古沙華喺Instagram上載嘅一段麥巴比喺更衣室被整蠱嘅片段就可見一斑。

畀人話個樣似忍者龜嘅麥巴比日前喺更衣室收到隊友送畀佢嘅禮物，當佢以為係名牌《Dior》嘅乜嘢名貴嘢，點知打開個《Dior》盒嘅時候就見到係個忍者龜面具，不過喺片段中見到被譽為「新亨利」嘅麥巴比依然笑得好燦爛，其他喺更衣室嘅隊友當然都笑到停唔到咁滯啦。至於麥巴比其後亦喺未換衫同換好晒衫之後戴起個忍者龜面具擺post，咁識做難怪會受隊友歡迎。

18歲嘅麥巴比今季外借到PSG後，喺法甲正選上陣八場已經為球隊貢獻咗四個入球同四次助攻，喺歐聯亦射入咗兩球。喺歐聯B組已經穩奪出線權嘅PSG，星期三就會主場迎戰些路迪。

睇片↓↓↓
http://bit.ly/2iFx8NL

----------
開賣！《BFB》4周年限定福袋，立即去HOKOBUY入手別注版紀念道具！
http://bit.ly/2zPmZpf