日本型男齋藤工成為影視圈搶手貨，上年同上戶彩合演《晝顏》更加係吸盡師奶fans，今日佢再有飲品廣告出街，今次同洋妞Model公路高速浸浴，真係恨死班女fans。

隨住齋藤工知名度急升，是非都接踵而來，好似當年佢搭上肉食女奧菜惠，女方曾經推出自傳，談及姊弟戀舊情擺明係講緊齋藤工，現時趁齋藤工成為當紅男星，令過氣嘅奧菜惠再有新聞價值，仲有人暗中向佢開價繼續爆料！

齋藤工又先後同艷星嘉門洋子、女星比嘉愛未傳過緋聞，最近就被爆同24歲人氣AV女優星美梨香發展地下情，消息指二人上年開始發展，星美周圍講自己同齋藤工係情侶，但亦有估計兩人可能純粹只是肉體關係，仲有傳佢嘅床照已經流出。

星美最近似乎都靠緋聞帶挈而人氣急升，佢仲會加入歌唱界，率領一班AV女優組成女團MillionGirlsZ，到下月底就會出首張EP正式出道。