林耀聲同女友張沛樂（沙律）、仲有洪杰同張立基等，噚晚喺尖沙嘴出席電影《乒乓情人夢》首映，仲有隱退多年嘅莫家堯，見佢個樣十年如一日，真係Keep得幾好。

最近一口氣拍完兩套電影嘅林耀聲，難得拖埋女友出嚟睇首映，佢話：「依家幫緊ViuTV拍新劇，難得抽到時間出嚟。」佢話呢排忙住拍戲連同女友相處時間都少咗，仲唔小心爆咗同居關係：「成日都拍通宵，朝早返嚟佢又瞓咗，都好少時間見面，不過佢好好會煮嘢畀我食。」

問到沙律嘅廚藝係咪好好？沙律即刻向住林耀聲話：「係咪好好呀？」男友就話：「梗係好啦，佢仲識得煲湯。」又識煮飯又識煲湯，呢個女友係咪娶得過？林耀聲話：「努力緊㗎啦，依家專注事業，等我做多啲嘢賺多啲錢先。」

另外，好耐冇見嘅洪杰透露早前已經同英皇完約，依家回復自由身，佢話：「我由07年開始喺公司已經十年，O依家回復自由身係時候可以試多啲工作上以前未試過嘅嘢。」佢透露有唔少前輩同公司曾經接洽佢，但佢希望暫時試吓自由身發展。

更多娛聞，喺晒《娛果》
http://fb.com/appledailyent