43歲嘅韓劇《Oh!必勝奉順英》男星安在旭噚日迎娶細佢11歲嘅音樂劇演員崔賢珠，由於婚禮就冇對外公開，所以喺婚禮前安在旭就單拖出嚟見傳媒，佢表現得好緊張，而噚晚都有唔少圈中人去飲，好似車太鉉、金鐘國、張東健、全慧彬等，原來唔講唔知安在旭所以揀6月1日呢個日子原來同車太鉉有關，事關車太鉉都係6月1號結婚，所以當安在旭問車太鉉時，車太鉉就提議6月1號呢個日子，唔知佢哋兩對夫婦之後會唔會約埋一齊慶祝。

而安在旭方面今日就公開咗婚禮內嘅照片，當中有佢同老婆行禮時嘅照片，只見現場環境好鬼浪漫，亦有唔少人去觀禮，真係好場熱鬧。

另外，啱啱喺上月底結婚嘅元斌同李娜英，噚日有人公開咗佢哋喺江原道旌善小麥田上誦讀結婚誓言嘅照片，而元斌選擇喺家鄉行禮，原來佢行禮嘅地方就正正係韓國大熱綜藝節目《一日三餐》拍攝地玉荀峰民宿屬同一個地方，唔少網民即時議論紛紛，估計呢處將會成為旅遊景點呢。