杜汶澤的網台新節目，先後搵過何韻詩及黃秋生訪問，新一集嘉賓就到90後童年回憶：E-kids阮民安（Tommy）。Tommy曾經被形容為MK代表、樂壇小強，最近高調支持抗爭者，形象大轉變。對於有警察叫抗爭者「曱甴」，Tommy說「曱甴」一詞「好X離譜」，又唔希望有人經歷相同難忍的感覺。至於纏繞E-kids多年話題，三人加埋會考不多於5分，Tommy揭謎底：「我兩個兄弟都冇考，我Maths有一分，仲要係我考。」

Tommy在訪問中講到入行經過：「02年出一隻碟，但我98年入去train。我哋係stareast，（老闆係）曾志偉、陳百祥、王晶，全部你啲friends。」阿澤話曾經同曾志偉、王晶算得上朋友，但講到阿叻就爆粗：「陳百祥從來都未friend過，黐X線。」Tommy就不忿搭嘴：「咁恭喜你啦，我同佢食過幾餐飯呀。」Tommy透露當時阿叻非常討厭E-kids：「有一次最嬲，嗰次港台頒獎禮，講到明我哋組合新人獎第一，Shine拎第二。收晒風喇，天佑喺廁所都恭喜我哋。」但Tommy說結果令人失望：「仆街，臨埋尾話抽走咗我哋個名，因為老細話要畀EO2，因為EO2先係佢嘅，我哋係校長嘅，我喺後台嬲到拍晒枱。」Tommy更指當時同公司有兩隊新組合，兩隊人互相不妥對方：「我哋係台都冇得上，但我哋要一齊上去唱首《魅力移動》。」他又說：「我哋嗰幾受歡迎嘛真心。」

翻查資料，第二十五屆十大中文金曲組合金獎為EO2，銀獎是Cookies，銅獎是Double R；至於Tommy提到的Shine，就獲得銀禧至尊新人大獎（組合）。

-----------------------------
【撐學生】
召集有心人 撐學生全年睇《蘋果》
立即按此