戴耀明入行25年，早喺佢入無綫之前，佢先喺1992年考入亞視，翌年參加「第12屆新秀歌唱大賽」（同屆冠軍為張崇基、張崇德兄弟），雖然當時冇得獎，但就順利加入無綫，於1994年播出嘅《小李飛刀》中演出，但只係演長老，冇人記得唔出奇。同年播出、由黎明擔正嘅《阿Sir早晨》，小明演其中一個學生，開始有人識得呢位小伙子。

小明其後嘅演藝路，雖然長期「靠邊站」、做配角，最高紀錄，根據《維基百科》，小明喺2001至2002年播出嘅古裝版《皆大歡喜》中，佢分飾過8角，食客、官差、小二乜都有；勝又勝在，小明個樣勁易入腦，見過冇可能唔記得。而佢嘅可塑性，由最「著名」嘅儍仔到近年最出名嘅《鐵馬尋橋》排長，以及《巾幗梟雄之義海豪情》皇軍向山達也，演邊樣似邊樣，再數到喺《EU超時任務》，小明演原居民兼地產職員，「小明」疑似衝出嚟見觀眾，一樣為人津津樂道。

另外，小明仲有一絕——似卡通人物，重點唔係特定似一個！好似佢同《芝蔴街》個Bert，完全可以用「激似」嚟形容！仲有《櫻桃小丸子》個爺爺友藏，長長哋嘅頭形，配埋對眼，勁有兄弟feel；講到眼大加面形，其實小明同《迷你兵團》（Minions）嘅Tim都好有兄弟相。數數吓，仲有《鬼太郎》入面嘅星君鼠，其實同小明都有幾分相似。

變化咁多，點夠佢玩？