當年今日
關於我們

隔牆有耳:張建宗對煲呔有話兒 - 李八方

蘋果日報 2009/07/05 00:00


基督教女青年會公佈最鼓勵說話調查結果,主禮嘅勞工及福利局局長張建宗亦有兩句金句:「我知道你已經好盡力㗎嘞!」、「無論發生乜嘢事,我都會喺你身邊支持你!」7.1遊行好多人大嗌煲呔下台,張建宗應該向煲呔講呢兩句話幫老細打氣。
煲呔有下屬開解,張建宗有麻煩時如何應付呢?原來佢都會致電社福機構求助熱線訴心聲,為顯示唔係吹水,即場背出女青熱線同芷若園求助電話號碼,「我處理唔到嘅社福問題就會打畀女青熱線。」
打電話訴心聲
市民怨氣多,呢啲熱線俾人打到爆,張建宗話金融海嘯熱線收到9,600幾個求助電話,當中2,200幾個要跟進,豬流感熱線就收到103個求助。佢話數字反映市民需要傾訴渠道,呢樣八方好明白,有見及此,政府應該設立更多熱線,最好包括「冇雙普選情緒壓抑熱線」、「曾蔭權不代表我憤怒熱線」,前者可以直駁西環,後者則接通禮賓府,相信對排解怨氣甚有幫助。