「小小超」李澤楷嘅得力助手顏金施（Wendy），2000年底由太古地產過檔電盈（其後嘅盈大地產（432））幫手揸大旗賣樓，負責政府當年批予電盈嘅數碼港住宅項目。佢以「香港蒙地卡羅」作包裝嘅貝沙灣，轉眼都由開荒到全部落成，可以話係圓滿謝幕。
盈大董事會噚日就宣佈，Wendy做到今年3月17號之後，就離任盈大執行董事職務，主要係想多啲時間陪伴家人，唔係同董事會之間有意見分歧。
顏金施呢位「靚女樓神」係港大舊生，文學院主修文學同語言，畢業後加入太古做見習生，其後愛上地產銷售同策劃，就走去考測量師同進修，輾轉喺地產界打滾廿年，今年已屆半百嘅佢，風采依然，活力充沛，斷估唔會咁早退休啩，希望好快聽到佢嘅新動向喇。