桌球唔算係節奏好快嘅運動，一旦對手「起break」嘅話，無份打嘅球手其實可以做嘅嘢唔多，至少就唔可以行行企企騷擾對手出cue，所以一般嚟講都係乖乖哋坐喺度，等下幾時有得再「埋檯」。不過，世俗嘅規矩只係適合凡人，對神嚟講係唔work㗎！

講緊嘅自然係綽號「火箭」嘅英國桌球手奧蘇利雲（Ronnie O'Sullivan），佢禮拜四係蘇格蘭公開賽一日打兩場波，喺32強鬥中國球手李行果陣，奧蘇利雲就曾經喺自己個位瞓著咗。呢位世界排名第2嘅球手話：「我瞓著咗呀，真係好正，我唔係果啲要扮嘢嘅球手，有陣時瞓下真係幾好，我知有鏡頭影住我呀，但有陣時，有機會嘅話梗係要瞓下喇。如果我要瞓就會咁做，真係需要瞓五、十分鐘嘅話就要做㗎喇！」

Ronnie繼續話：「我真係打得唔係咁好，所以要趁局波就嚟打完，到下一局開始前唞下，五局波當中我瞓到15分鐘，呢啲真係『回魂覺』嚟。瞓一瞓係有用㗎，我要叉電咪瞓囉，一係瞓一係輸波。我喺邊都瞓得著，車尾又好，火車又好，我直頭係專家嚟，因為我係有失眠症㗎，每晚都係瞓得兩、三個鐘。」

--------------------
球迷一定要知！英超一哥曼城，已經登陸『BFB』！登入即送藍月球星： http://bit.ly/2AAiPDS