【銅鑼灣】
女子組合少女標本成員簡淑兒（Jessica），加入樂壇前曾於2012年參選港姐，但16強不入。現在單飛的她常被指變臉，數月前到電台宣傳新歌更自稱未有男友，鍾情成熟暖男。

一支公再行

言猶在耳，Jessica日前就孖新歡在銅鑼灣hmv濕平，但期間新歡不耐煩，二人一度面左左。
當日下午6時許，戴着口罩的Jessica與一名男子行街，他們一邊選東西，一邊傾偈，似足熱戀情侶。半小時後，男子開始顯得不耐煩，獨個走出街外「呼吸」，一口氣吸了兩支煙後，才施施然返回店內會合Jessica。Jessica有點不悅，男方見她仍未揀完，兩人講了一輪，離開時面燶燶，Jessica拋低男伴先行，走入另一個商場繼續逛，尾隨的男伴就企門口篤電話，全程未有入去。
Jessica這次在商場逗留了大約20分鐘，出來時氣已消，估計男伴用電話短訊逗她。二人其後前往停車場取車，男伴想伸手拖Jessica，後來見人多就即刻縮手。

揸40萬戰車

對於爆出新戀情，Jessica昨日回覆本報時說：「嗰日唔係嬲，嗰位係朋友，我有啲唔舒服，所以戴住口罩。我手全程插喺褸袋，我係冇拖手嘅，只係嗰下角度似拖住，嚟緊都忙，會開新劇，多謝大家關心。」Jessica新歡駕駛40多萬的Audi房車，根據車輛登記資料，車主為一名姓翁男子，英文名叫Marcus。
採訪、攝影：梁繼光、楊定