當年今日
關於我們

足動神經:
今晚睇兩個「阿簡」鬥法 - 波神

蘋果日報 2015/02/10 00:00


英超走得好快,只係半季,人面可以全非,預測可以全盤推翻;今晚快車矚目大戰,利物浦迎熱刺,兩位同係廿一歲嘅冒起新星、英文姓氏讀音相近嘅哈利卡尼(Harry Kane)同安利簡恩(Emre Can、圖)兩位「簡生」攻守對決,值得捱夜一睇。
英超屆屆估前四,難度唔比選冠軍遜色,季前筆者喺拙欄預測,車仔封王,最強對手唔係要爭衞冕嘅曼城,係新軍嘅曼聯;半季已過,車仔封王越嚟越穩,不過大患未必係曼市雙雄,其中熱刺個勢持續好勁,上輪藉列強失分成為大贏家,又係靠卡尼呢位土炮射手打垮死敵阿仙奴。普捷天奴季前由修咸頓,走去教長期係「倫敦三哥」嘅熱刺,俾人笑過錯檔;到𠵱家「肥仔普」得戚到夠膽同傳媒講,修咸頓仲係咁勁,都係靠佢上季執好隊波。
半年前,熱刺聯賽首循環主場吞利記三蛋,如今呢支北倫敦隊喺聯賽打上第五,比今晚對手紅軍高兩級及四分,追到次位嘅曼城只係差六分;「利、熱」都要踢下周中嘅歐霸盃淘汰賽,現時實力非常接近。睇番首循環陣容,熱刺仲係用「麻煩多多」嘅艾迪巴約打箭頭,哈利仔只做後備冇得落場;至於紅軍當時有大量新兵加盟,代替離隊嘅哨牙蘇,其中安利簡恩呢位土耳其裔嘅德國小將,喺嗰場有後備上陣,之後有傷唞咗一排,打防中表現唔突出,但去年尾轉型,喺紅軍三人防線擔任要角,出現重大突破。
唔好以為英超領隊一定位置高學問高,有時執好隊波都係靠撞手神,靠膽識。利記領隊羅渣士一向戰術敢於創新,三中堅之中,身價幾億港元嘅洛夫雲唔穩,高路托尼又要踢非洲國家盃,結果用安利簡恩墮後試出彩虹。踢後衞表現好,唔會好搶眼,但堅實數據冇得呃,由簡恩上年尾紅軍大炒史雲斯4:1轉踢中堅起,呢位大隻仔踢足利記十一場波,球會錄得六勝五和失六球(九十分鐘計);啱啱場打吡,嘜到愛華頓中鋒盧卡古全場零射門。防線執好,紅軍𠵱家又有射手史杜列治復出,爭前四,筆者唔敢睇少。
前鋒入到波,更吸引眼球。熱刺唔係艾迪巴約冇態、蘇爾達杜唔識入波,另一位「簡生」卡尼上位冇咁快。今年元旦日能令英格蘭最強雙中堅,泰利及加利卡希爾大出洋相,助熱刺主場大炒車仔5:3,卡尼嗰場入兩球已大露鋒芒。普帥好嘢在同教修咸頓一樣,畀好多機會班九十後小將;熱刺近十場聯賽贏波有八次開2:1,證球隊戰意強、體力厚,條中場線喺上個禮拜六掃到阿仙奴班大牌,真係企都企唔穩。
熱刺着晒火,同紅軍實力接近,呢場成冷門可以一博;當然,兩軍戰術變化大,又力爭前四位不想和局,入球「大」可兼顧。總好過禮拜日捱夜睇曼聯作客韋斯咸,紅魔執咗半季都未掂,落後只識派「爆炸頭」費蘭尼出嚟亂撼,幸運追平,對隊波幾失望。文:波神
empty