好多好多年前，坊間曾經瘋傳過一個關於麥當勞茄汁包裝神秘編號之謎，流傳話茄汁包上面A1至A12嘅號碼，代表唔同嘅酸甜度。傳言由冇人信講到個個都信，麥記先走出來澄清，話編碼只不過代表唔同生產線。呢場誤會水落石出，又輪到另一快餐集團肯德基嘞。
內地微博噚日瘋傳一則《KFC番茄醬的秘密》帖文，內文話：「原來番茄醬是分號的！1號醬最甜，8號最酸。」網上仲有一篇報道話，記者喺廣州問過肯德基嘅店員，證實咗呢個傳言。但八方就好有保留，就算要唔同酸甜度，使唔使要八款咁多呀大佬。八方仲去埋香港嘅肯德基睇過，可惜搵唔到類似包裝茄汁，店員亦話冇聽過茄汁有唔同酸甜度。