美股周三晚果然繼續跌，杜指升軌及50日線（現處8752）宣告失守，但仍險守20日線（現處8687），以8694收市。
杜指會否進一步跌穿20日線，向下尋底，很大程度要睇噚晚公布美國GDP總值修訂及今晚密歇根大學消費情緒數據，當然，格老今晚發表演說亦係市場焦點。
港股噚日跟隨美股調整，但趙飛雲睇啱市都要輸錢，噚日早市喺0.152元追入60萬份恒指Put輪9287，買入後隻輪最高見過0.16元，但午市走晒樣，一度插落0.142元低位，搞到趙飛雲幾乎要跳車，不過回心一想，就算噚晚美國第2季GDP較市場預期佳，今晚公布8月份嘅消費情緒數據亦未必好，寧願先硬接一棍都唔好俾人偷雞。恒指最後收10061，跌幅收窄至69點，而恒指Put輪9287收0.15元。

MACD未確認轉壞
美股自身難保，恒指噚日連20日線亦跌穿，技術進一步轉壞，有利造淡。不過，若以中線技術指標MACD分析，杜指目前仍處雙牛向好，不過MACD線開始回落。恒指方面，MACD線升近0線回頭，在跌穿訊號線前，仍未能確認轉淡。趙飛雲現時買Put輪是略為偷步，但短炒主要睇短線指標，等MACD轉勢往往是太遲。
提出此點，是提醒讀者港股雖向淡，但亦可能只是整固，炒Put輪要快手快腳及提防好友回馬槍。
趙飛雲