電影《今晚打喪屍》噚晚喺觀塘搞首映，演員白只、顏卓靈（Cherry）、張繼聰、萬梓良、王敏奕都有出席，套戲入面啲人係因為雞蛋變喪屍，所以為咗搞搞氣氛，一班演員就即場玩扑雞蛋，每人一隻雞蛋，打自己額頭，Cherry一試即刻嗌痛，男友白只挺身而出，用額頭碎蛋，點知Cherry唔留手咁大力一「鏗」，連白只都嗌痛話：「佢都唔算係打，係樁落來啫！平時冇打我，大家好斯文。」結果導演盧煒麟打中咗隻生雞蛋，搞到成頭蛋汁。

提到套戲，白只話Cherry用美色誘惑張繼聰，問Cherry同阿聰有冇親熱戲，佢話：「有一場攬嘅戲，佢兩個就好似情侶咁，兩個一齊會唱歌，唱完好開心咁，講啲嘢得佢哋兩個自己明。笑完之後又擊掌拖手仔，又一齊食煙。」

王敏奕（Venus）有男友曾國祥現身支持，Venus戲入面要着婚紗，曾國祥話終於睇到女友婚紗Look，即刻有人問，佢哋幾時結婚，曾國祥好坦白咁話：「未有計劃住。」呢一刻Venus即刻眼仔碌碌，望住男友，問曾國祥阿媽有冇催婚：「呢方面佢哋都幾由得我，知道我哋開心，佢哋就開心。阿媽一早喺呢方面放棄咗，我細個鍾意頂撞阿媽，成日話結婚做乜，係唔相信婚姻嘅人嚟，o依家佢見到我咁Stable佢都好開心。」