又到聖誕，又到聖誕！
每年呢個時候政務官都會搞活動聚吓。嚟緊就有兩個，除咗X'maslunch呢啲指定動作之外，喺十二月十七號AO會就搞咗個夾bandparty，地點喺美麗華酒店。
老實講，呢啲partyAO仔冇乜興趣，不過啲band都有啲吸引力。先有立法會秘書長馮載祥加金管局EddyChan打頭陣，再加埋國泰PhilipChen加PeterLam包底。國泰長期靠政府搵食，呢啲場合一定畀面啦。
X'maslunch則早一日十二月十六號喺Banker'sClub搞，有口痕友就話唔係好想去，夾成四百五十蚊食橡皮火雞，又要睇煲呔猛話「飲香港水、流香港血」。講真，公務員條例明文禁止AO搞工會，AO會嚴格講只算聯誼會，煲呔亦唔想AO搞太多嘢。有怨無路訴，呢啲粉飾太平嘅活動免得就免啦！
早排老鼠樂園有好多負面新聞。由不起訴要求食環署職員「除帽除徽」，到優惠本地居民減五十大元，不禁使人擔心樂園啲運作。其實，本進士同好多政府同志都對樂園打救香港經濟存在極高期望，一班老友都喺樂園開幕後扶老攜幼去支持。一眾問責高官更不例外，前仆後繼地帶同家人到樂園撐場。印象最深刻要數負責旅遊政策嘅經濟發展及勞工局局長葉澍堃，佢帶埋明星打扮嘅黑超仔仔去玩。

要求「先消費後付款」

不過，唔係每個問責高官都咁識做。有啲「唔夠班」嘅仍鍾意搞特權，替特區政府添煩添亂。究竟講邊個？話說有個肥仔局長帶同老婆細路入場做show，不過可能因為太多記者跟住，老婆同細路都未能盡興。事隔數星期，肥仔局長叫秘書打去樂園再安排老婆同細路再去。先唔講叫秘書安排家人嘅私人活動是否濫用職權，最離譜係要求樂園提供特別安排，讓老婆同細路喺樂園內享受「先消費，後付款」嘅特殊安排，即係要樂園記帳，之後寄番單據畀佢。
老實講，呢種要求實在多餘，購物後即埋單有幾複雜？可能有人認為這才是VIP吧！可憐人家老鼠樂園嘅職員要對付內地貴客已一頭煙，肥仔局長重要扮權貴。爆呢單料畀我嘅人沒有說明最終個特殊安排是否成事，不過喺樂園嘅朋友則媽媽聲。
特區政府喺煲呔「強政勵治」之下民望升番，呢個肥仔擺明同煲呔抬槓。如果我係煲呔實罰佢喺樂園做一日義工扮老鼠，既可處罰佢，又可以幫佢減吓肥。

傳真︰2623-9278
電郵︰[email protected]