時近年尾，新股排隊趕搭尾班車上市，其中一隻新股必瘦站，計劃集資約4億攻大陸市場，今日喺中環置地文華東方酒店搞上市記者會。纖體公司要製造聲勢，當然要搵星級代言人，所以大會搵咗主席歐陽江嘅好友佘詩曼撐場。阿佘有份主演嘅《天與地》近日好評如潮，加上樣靚身材正，華華今日點忙都要去湊熱鬧。
講開阿佘，早前佢因為260萬代言費嘅報道，搞到哭笑不得，仲特登打電話畀歐陽江問：「俾稅局追數點算？」話說必瘦站初步上市文件中，對於代言人費用嘅內容，顯示得比較混亂，搞到傳媒報道同事實有出入，當然事實阿佘收幾多大家都仲係唔知，只係知佢冇收260萬咁多。

選舖要訣：名店多　快餐店多

至於另一代言人傅穎，亦唔係之前報道所講，代言費用係零！有關方面話，各個代言人由於代言時間有重叠，好難單憑年份嚟計代言費用，睇嚟記者要八卦都有啲難度。
講開又講，必瘦站唔只揀代言人有一套，連喺內地揀新舖都有獨特準則，首先一定要喺快餐店密度高嘅城市，咁先至確保多肥人要瘦身，跟手仲要喺名店雲集嘅大商場，因為嗰度自然有大把有錢客。
集團目標係內地直營店三年內由44間增至150間，仲講明可分派利潤100%做股息，唔知投資者會唔會同佢啲瘦身客一樣咁受落呢？

李華華
mailto:[email protected]