【債主臨門】薛芷倫嘆易手後失去親切感：當年蒸老鼠斑最好！
蘋果日報 2020/03/10 21:15
薛芷倫
福臨門第三代傳人徐德強被追債三千多萬，爆發經營危機。福臨門當年被譽為「富豪飯堂」，近年易手後，屢被追數，甚至一度被入禀申請清盤，風光不再。
薛芷倫(Fanny)和前夫、大生銀行後人馬清偉曾經是多年忠心顧客，她今日接受蘋果訪問時，對福臨門面對債主臨門，大表可惜。「嗰時我哋帶住啲仔女，一家大細成日去食飯，周日就去食點心，請客食飯、做冬過節包間房咁，好方便。福臨門嗰時就等於ball 場嘅Grand Hyatt咁，啲朋友、生意拍檔都係喺嗰度見面、聚頭，係一個時代象徵。而家我啲仔女都廿幾歲喇，如果因為生意困難結業，真係好可惜。」她指當年最愛福臨門的蒸魚，「當年好熟㗎，啲廚（師）成日出嚟同我哋傾偈，佢哋知道晒我哋嘅口味，幾時少甜、少油，炒飯要乾身啲定腍啲，做得最好係蒸魚，蒸龍躉、老鼠斑時間校得啱啱好，海鮮都好好。當年要食鮑參翅肚，一係福臨門，一係去新同樂。」
她指後來福臨門易手、主廚換人，親切感大失，近年已甚少光顧，「我有去食過，嘢食都仲OK，但少去喇，多咗好多新派中餐廳可以試，啲人會鍾意去啲型啲、摩登啲嘅場，傳統中餐多咗好多競爭對手。」她近年亦投資開多間新派中餐，如：mott 32等，因不乏外籍顧客，疫情下餐廳生意尚算不俗。
採訪：林妙萍
薛芷倫當年常帶仔女去福臨門飲茶，現時已改去其他地方。
薛芷倫亦有投資開設新派中餐廳。