姜大偉曾經做過邵氏武師，後來因為被恩師導演張徹提拔，憑《報仇》一片於1970年成為香港首位「亞洲影帝」紅遍影壇，當年佢拍過無數武俠片，不過後期佢做導演嘅時候，就主力拍溫情片，姜大偉日前接受商台《1圈圈 星光背後》訪問，就話因為覺後自己永遠都唔及師父張徹、劉家良拍得好，覺得唔可以破壞張徹導演畀佢嘅形象。

訪問中姜大偉又講到喺90年代初，佢賣晒所有資產，一家人移民加拿大溫哥華，原因有好多，除咗係囡囡依蘭升學及九七問題之外，最主要係因為對當時嘅香港電影圈好失望：「嗰時我係對電影界極度失望，大家仲記得當時黑社會入侵電影圈，電影界完全變質，大家鬥搶片花鬥搶演員，譬如拎着劉德華個名就可以賣埠，是好差好亂！我覺得自己已經唔再屬於呢度，就決定走。我係賣晒所有嘢，決定唔會做太空人，點知一到加拿大，師傳張徹就搵我去台灣拍劇，師父搵我係唔可以推，所以又返嚟。」

精選娛聞，喺晒《娛果》
http://fb.com/appledailyent