大台同騰訊嘅合拍劇《使徒行者2》喺星期一已經播出，一如之前嘅合拍劇，大陸嘅觀眾可以率先一口氣喺逢周一睇晒10集，香港嘅觀眾唯有得個等字！

雖然喺首播嗰晚先嚟一個大晒冷，一連出咗好幾個臥底，包括有洪永城、連詩雅、何雁詩、楊潮凱及古明華，完成案件之後，大家返咗去基地聚會，點知當三哥苗僑偉行開講電話嗰陣，基地突然大爆炸，五個臥底全部死晒！

不過因為呢套劇講緊黑吃黑、黑警同臥底生活，所以咪以為死咗5個就冇嘢睇，本來喺第一輯嘅《使徒》，講緊歡喜哥(許紹雄)係臥底警察，喺噚晚播映嗰集，話佢為咗老婆陳煒同囝囝，諗住回復警察嘅身份，點知最後因為黑幫內訌，連累陳煒被殺，最後歡喜哥決定刪除自己嘅警察檔案，另組新字頭同老婆報仇！

除咗陳煒之外，飾演警察嘅張兆輝，亦都俾殺手殺咗，本來警隊高層諗住搵三哥復職，但係三哥最後冇重返警隊，反而自己去搵返臥底嘅下落，亦希望為張兆輝嘅死查出真相，最後佢同新臥底成員黃翠如，發現喺黃德斌身邊嘅頭馬周柏豪，原來都係臥底，黃德斌最後俾袁偉豪殺死，死嗰陣歡喜哥拎咗啲貨，希望揸住啲重要嘢，同新一代揸弗人陳豪對著幹！

其實睇番套劇，基本上大部份客串之星都冇乜好下場，基本上出完場就被賜一死，到咗第6集開始，劇情主要係圍繞陳豪同宣萱、袁偉豪同黃翠如仲有周柏豪嘅三角關係，袁偉豪仲身負重任，佢一力承擔頭十集嘅露肉部份添！

今次陳豪做新一代揸弗人，角色奸奸哋，而且仲好打得，喺第10集終於同三哥有同場，兩個都係型佬代表，企埋一齊真係不相伯仲。但係可能角色轉換得太快，搞到有啲場口睇落好混亂，而且亦好犯駁，好似臥底之間可以隨意見面兼交流情報！