韓國男星崔振赫夥拍韓劇《三流之路》女星宋昰昀主演嘅MBN劇集《馬成的喜悅》，早於10月25號已經播畢，不過隨即爆出製作公司拖欠演員及劇組工作人員酬勞嘅是非，製作公司當時表示會於11月付清酬勞。(相關新聞連結： https://bit.ly/2Sng9zr )

不過今日再有相關人士爆料，指《馬成的喜悅》嘅女主角宋昰昀及女配角珠妍至今仍未收到酬勞，而且因為製作公司冇支付酬勞，所以劇集拍攝嘅3個月期間，演員嘅所屬事務所要負責埋造型、服裝、車輛等費用，損失已高達數千萬韓圜，直指製作公司拖久酬勞嘅情況嚴重。

一般嚟講，劇集拍攝會分3次支付酬勞，分別喺開拍前、拍攝中期及煞科後，但《馬成的喜悅》播畢至今兩個月，製作公司卻一再拖欠酬勞，據悉只有男主角崔振赫及男配角Hoya完整地拎到應得嘅報酬，部份配角演員拎到四分之一，至於宋昰昀及珠妍就完全冇收過錢，有指係因為《馬成的喜悅》演員嘅酬勞比想像中高，所以導致付款出問題，但依照合約期限，製作公司需喺本月內付清所有人嘅酬勞，但製作公司至今冇任何回應。

精選韓流，喺晒《娛果》
http://fb.com/appledailyent